"Алиш язучы да, батыр да”

       15 сентябрьдә балаларның яраткан шагыйре Абдулла Алиш тууына 105 ел тулды.

 

        Абдулла Алиш искиткеч эшлекле, энергияле,тәвәккәл кеше булган. Дөрес, бу сыйфатлары күзгә бәрелеп тормаган. Әмма якын иптәшләре аның тышкы тыйнаклык астында яшеренгән бу сыйфатларын яхшы белгәннәр. Ул кечкенәдән үк бик актив була: стена газетасы чыгаруда катнаша, комсомол бюросына сайлана, отряд вожатые була. Замандашлары Алишны бик мавыгучан кеше буларак хәтерли. Әдәби жанрларның ул тотып карамаганы юк диярлек. Повесть, хикәя, пьеса, очерк, шигырь – ул барысын да илһамланып яза. Ләкин барыннан да бигрәк ул балаларны ярата. Шуңа күрә аның иң әйбәт әсәрләре – балалар өчен язылган хикәяләр һәм әкиятләр. Аның "Капкорсак патша”, Чуар тавык”,Сертотмас үрдәк”, Нечкәбил”, "Каз белән аккош”, "Аерылганны аю ашар, бүленгәнне бүре ашар” һ.б бик күп әкиятләрен укымаган бала юктыр. Алиш әкиятләре татар әдәбиятының классик хәзинәсенә әверелде.

         Үзәк китапханәнең татар һәм туган як турындагы әдәбият бүлегендә "Алиш язучы да, батыр да” исемле Абдулла Алишны искә алу кичәсе узды. Кичәдә 2 нче татар гимназиясенең 6 сыйныф укучылары катнашты. Аларны башта Алишның тормыш юлы һәм иҗаты  белән китапханәче Раушания Вәлиева таныштырды. Шулай ук балалар Алишка багышланган презентация карап уздылар. Аның әсәрләрен искә төшереп алдылар. Кичә азагында Абдулла Алиш әкиятләре буенча эшләнгән  татарча "Сертотмас үрдәк”, Чукмар белән Тукмар”, Куян кызы” мультфильмнарын карадылар. Кичә балаларга  бик ошады.